May və İyun Ayında Oxuduqlarım // 2017
Haziran 30, 2017
Hər kəsə, salamlar
May ayında oxuduğum
kitablar haqqında blogda yazmağa vaxt tapa bilmədiyim üçün düşündüm ki, bu iki
ayı birləşdirərək bir yazı yazım. Belə ki may ayında çox yaxşı kitablar
oxumuşdum, ancaq iyun ayında imtahanlarım olduğu üçün çox da kitab oxuya bilmədim.
İlk olaraq may ayında
oxuduğum kitablar haqqında yazım:
1) Rick
Yansey – Son Yıldız 3/5
“5.Dalga” seriyasını nə qədər çox sevdiyimi hər yerdə deyirdim, ancaq
artıq seriyanın son kitabını oxuduqdan sonra fikrim tamamilə dəyişdi. Bir son
kitab olaraq bu cür sonu olmamalıydı. Sanki yazıçı məhz yad planetliləri bir
yerə bağlamaq üçün belə son verib. Bəzi yerlərini sevsəm də, bəzi yerləri hələ
də qaranlıq qaldığı üçün sevə bilmədim. Yenə də “5. Dalga” mənim sevdiyim
kitablardan biri olaraq qalacaq.
2) Cassandra
Clare – Mekanik Prens 5/5
Sadəcə möhtəşəmdi. Yazıçının “Ölümcül Oyuncaklar” seriyasını hələ də
oxumamışam. Səbəbi isə oxuyanların çoxu sevmir, əslində ilk kitabın, yəni
“Kemikler Şehri”nin filmini izləmişdim və sevmişdim. Ancaq 6 kitablıq bir
seriyaya başlamağa qorxuram.
“Cehennem Makinaları” seriyasını isə çox sevirəm. İlk kitabda sevə
bilmədiyim obrazlardan olan Will’ə belə bu kitabda aşiq oldum. Uşaq vaxtı
yaddaşımıza həkk olunub bizi qorxudan şeylər əslində bəlkə də ömrümüz boyu
kabusumuza çevrilə bilər. “Mekanik Prens”i oxuyarkən o qədər ağlamaq istədim
ki. Ah, Will.
3) John
Steinbeck – Fareler ve İnsanlar 5/5
Bu kitabı çoxdandır ki, kitab rəfimdə oxumaq üçün gözlədirdim. Çünki
nədənsə mövzusunu bilməsəm belə elə üz qapağından hiss edirdim ki, məni
ağladacaq bir kitab olacaq. Elə də oldu. Nəhayət may ayında kiçik bir cəsarətlə
oxumağa başladım və yaşlar gözlərimdən süzülərkən sözlər axıb getdi. Baş qəhrəmanlarımız
olan George və Lennie işləmək üçün yeni bir fermaya gedirlər. Tək istədikləri
bir az pul yığıb öz torpaqlarını almaqdır. Bu fermada bu xəyyallarını gerçəkləşdirmək
üçün bir addım daha atmış olarlar. Ancaq Lennie’nin bəzi istəkləri sonda həmişə
onun başını bəlaya soxar. Kitabı oxuyarkən görmüş olduğumuz təkcə Lennie və
George’un həyatı deyil. Yeni fermada yaşayan və işləyən başqa bir çox
insanların daha həyatlarını oxuyuruq. Həmçinin hələ də günümüzdə təəssüflər
olsun ki, öz aktuallığını itirməyən cinsi və irqi ayrı seçkilik məsələlərinə də
rast gəlmək mümkündür. İncə bir kitab olmağına baxmayaraq çox sevərək
oxuyacağınız bir kitabdır. Oxuyun. Kitabın filmi də çəkilib.
4) Marie Rutkoski – Kazananın Laneti 4,5/5
Sevərək oxuduğum bir digər kitab daha.
Bu kitab haqqındakı fikirlərimi blog’da yazmışam. Əlavə olaraq onu
qeyd edim ki, seriyanın ikinci kitabı da artıq satışdadır. Hələ də
oxumamısınızsa ikisini birlikdə alıb oxuya bilərsiniz.
5) Murad
Cəfərov – Bir Cüt Qanad 4/5
Deyəsən blogda ilk və tək Azərbaycan dilində oxuyub haqqında fikirlərimi
yazdığım bir kitabdır. Nə deyirik? Davamlı olsun.
May ayında oxuyub çox sevsəm də vaxt tapıb haqqında fikirlərimi yaza
bilmədim. Son vaxtlarda öz dilimizdə, öz yazıçılarımızdan oxuduğum ilk kitab
olduğunu qeyd etsəm yeridir. Düzünü desəm kitaba qorxu ilə başlamışdım. Dilinin
məni yoracağını, bəyənməyəcəyimi düşünürdüm, ancaq elə olmadı. Həm dili çox
axıcı idi, həm də mövzusu çox maraqlı idi.
Bir gün baş mələk Uriel cəhənnəmə gəlir və burada günahkarlardan
birinə bir iş təklif edir qarşılığında isə bir cüt qanad verəcəyini deyir. Əlbəttə
ki belə bir təklif qarşısında bizim günahkarımız işin nə olduğunu soruşmadan qəbul
edir. Sonra isə hadisələri baş qəhrəmanımız olan bir qızın ağzından oxuyuruq.
(qızın adını unudub baxmağa da ərinən bir ədəd Zema).
Belə ki qızımız bir gün gözünü bir xəstəxanada hər şeyi unutmuş bir şəkildə
açır. Bəzi səslər eşidəndə düşünür ki, həqiqətən də dəli olub. Ancaq işlər
düşündüyü kimi getmir.
Mələklərlə bağlı fantastik kitablar oxumağı sevirsinizsə bir şans
verin. Mən sevərək oxudum. Klişeləri olmağına baxmayaraq, gözəldi. Oxuyuuuun!
6) Sylvia
Day – Sana Soyundum 3/5
Çoxdandır ki, bu seriyaya başlamaq istəyirdim. Nəhayət may ayında pdf
olaraq yükləyib oxudum. Erotik romansdır, bəri başdan deyim. Mənim üçün
ortalama bir kitab oldu. Baş qəhəmanlarımızın hər ikisinin qüsurları var idi. Yəni
bu o deməkdir ki, möhtəşəm olaraq gözümüzdə böyütdüyümüz obrazlar əslində heç də
möhtəşəm deyil. Ancaq bəzi məqamlarda Eva məni o qədər sıxdı ki, artıq bezdim.
Yarımçıq qoymaq istəmədiyim üçün oxuyub bitirdim. Gideon Cross’a aşiq olmamaq əldə
deyil.
Qeyd edim ki, seriya 5 kitabdan ibarətdir. Bir ara hətta belə bir söz
də yayılmışdı ki, seriyanın filmi çəkiləcək. Ancaq hələ də bir xəbər yoxdur.
7) Albert
Camus – Yabancı
Bu kitab haqqında nə yazsam hələ də bilmirəm. Fikirlərim hələ də tam yerinə oturmayıb. Səbəbi isə baş
obrazımızın vecsizliyə olan bağlılığıdır. Əslində başqalarına nisbətən hər şeyə
reaksiya verməyən biri olaraq onu başa düşmək mənim üçün o qədər də çətin
olmamalı idi. Ancaq deyəsən elə buna görə də başa düşməməyi seçdim.
Bir insanın hər şeyə qarşı necə vecsiz olmağından bəhs edir. Düşünürəm
ki, oxuyub hər kəsin özü bir nəticə çıxamağı daha yaxşıdır.
8) Ray
Bradbury – Fahrenheit 451 4/5
Yazıçının daha əvvəl bir hekayəsini oxuyub çox bəyənmişdim. Elə buna
görə də bu kitabını da oxumağı çox istəyirdim. Nəhayət bu ay Fahrenheit 451 ə
başladım. Heç düşündünüzmü görəsən bu sözün mənası nədir? “Fahrenheit 451”. Bu kitabların
yanma dərəcəsidir. Kitabın ilk cümləsindən bu açıqlanır. Hadisələr əslində hər
kəsin xoşbəxt yaşadığı bir yerdə keçir və burada insanlar öz xoşbəxtliklərini
dünyanın qalan hissələrindən xəbər almadan, kitabları yandıraraq yaşayırlar. Bir
düşünün, dünya yox olduğu bir dönəmdə bizim ölkədə ancaq xoş xəbərlər verilsəydi,
informasiya məqsədi ilə alınan məlumatlar yox olsaydı. Kitablar olmasaydı. Nədə
olsa insan düşünməsə, öyrənməsə daha xoşbəxt yaşaya bilər, elə deyilmi?
Kitabda ən az gördüyümüz obrazlarından biri olan Clarissa’nı elə ilk
cümləsindən çox sevdim. Nədə olsa bizə ən yaxın gələn o idi.
Sadəcə oxuyun.
9) Julie
Cross – Fırtına 4/5
May ayını son kitabı da bu oldu. Çox sevərək oxudum. Kitabı oxumamışdan
əvvəl kitab haqqında bildiyim sadəcə olaraq zamanda səyahətdən bəhs olunduğu
idi. Fantastik janrda bir kitabdır. Əminəm ki, mənim kimi timetravel sevənlərin
sevərək oxuyacağı bir kitab olacaq. Adicə kitabın arxa hissəsində yazılan qısa
cümlələr belə oxumaq üçün özündə maraq yaradır.
“ Günümüzde Jackson ve Holly birbirine sırılsıklam aşık.
Gelecekte Holly, Jackson’ın kollarında can verecek.
Geçmişte Jackson kaderi değiştirmeli.”
Seriya üç kitabdan ibarətdir. Məndə sonuncu kitab olmasa da tezliklə əldə
etməyi planlayıram. İkinci kitabı tezliklə oxumaq istəyirəm, çünki elə yerdə
bitdi ki, həqiqətən heç gözləmirdim.
İndi isə keçək iyun ayında oxuduğum kitablara. Biri pdf olmaqla 4
kitab oxudum:
1) Pepper
Winters – Tess’in
Gözyaşları 4/5
Bu kitabı imtahan ərəfəmdə bir az dincəlmək üçün oxumuşdum. Kitab erotik
janrdadır. Mövzusundan bir az yazmaq olarsa Tess bir gün sevgilisi ilə tətilə
gedir. İndi bu qızı həqiqətən başa düşə bilmirəm. İnsan necə olar da başqasına
görə özü istəklərindən əl çəkər. Bu arada elə buna görə də sevgilisini də başa
düşməmişdim. Daima öz istəklərinə önəm verərək qızın arzularını görməzdən gəlirdi.
Nəysə, getdiyi tətildə biriləri tərəfindən qaçırılır və bundan sonra həyatı
tamamilə dəyişir. Klişeliklərdən uzaq bir kitab olduğunu da qeyd edim. Çünki “Fifty
Shades of Grey”dən gördüyümüz BDSM burada da olsa da, mövzusu, xarakterləri
tamamilə fərqli tərzdə idi.
Bu əslində Bella’nın “Mən vampir olmaq üçün doğulmuşam” dediyi halda,
Elena Gilbert’in vampir olduqdan sonra oturub ağlaması kimidir. Yəni Ana BDSM’ni
nə qədər istəmirdisə, Tess bir o qədər ona doğru can atırdı.
Kitabdakı Q obrazını hələ anlaya bilməsəm də, etdiyi işlərlə kitabın
sonunda qəlbimi qazandı. Seriya üç kitabdan ibarətdir, ancaq yalnız iki kitabı
türk dilinə tərcümə olunub və “Arkadya Bitter” nəşriyyatı bağlandığına görə
üçüncü kitab gəlməyəcək. Buna görə də seriyanı pdf olaraq yükləyib oxudum. İkinci
kitabı da oxuyub sevsəm son kitabını ingilis dilində oxuyaram.
2) Jojo
Moyes – Senden Sonra Ben 4/5
Yenidən Louisa’nı görmək çox gözəl idi. Will’dən sonra düşünürdüm ki,
kitabı oxumaq maraqsız olacaq, ancaq heç də elə olmadı. İlk kitabı sonunu bilərək
oxumuşdum, bu kitabda isə heç bir şey gözləmədən oxudum və çox sevdim. Əgər ilk
kitabı oxuyub bəyənmisinizsə bu kitabı da oxuyuuun.
Xəyalımızda sarı xəttli corabları ilə Paris küçələrində hər kəsə o
pozitiv enerjisini göndərərək gəzən bir Lou qalmışdı. Ancaq bu kitab sayəsində əslində
hər şeyin bu qədər asan olmadığını görürük.
Kitabdakı yeni obrazlara başlarda isinə bilməsəmdə sonda çox sevdim.
3) Benokız
– Sevgiler Benodan 4/5
Daha əvvəldən instagramda @benonunblogu hesabını izləyirdim. Aranızda
takib edənləriniz varsa bilirsiniz ki, Beno heç gözləmədiyi bir anda xərçəng xəstəliyinə
tutulmuşdu. Ancaq buna baxmayaraq daima şükür etdi, xəstəliyini ona verilmiş
bir imtahan kimi qəbul etdi və ona boyun əyməyərək qalib gəlir. Bundan sonrada
həyatında olanlarla bağlı bu kitabı yazır. Kitabın başlarından göz yaşlarımı
tuta bilmədim. Hətta imtahan ərəfəsində oxumağa başlamışdım, ancaq baxdım hər
cümləsinə ağlayıram qoydum bir qırağa. Bu kitaba bir kitab olaraq deyildə bir
gündəlik olaraq yanaşsanız çox sevərsiniz. Kitabın hər səhifəsində Benonun
şükürləri əksik olmadığı üçün qəlbinizə isti bir hiss yayılır. Yeri gələndə
ağlasanız da, yeri gəldiyində bəxş etdiyi hisslər insanı xoşbəxt edir.
Bəzi günlərdə açıb vərəqləyərək xoşbəxtlik tapa biləcəyiniz bir
kitabdır.
4) Victor
Hugo – Bir İdam Mahkumunun Son Günü
Bu kitab haqqında nələr yazmalı olduğum haqqında heç bir fikrim
yoxdur. Çox sevərək oxudum. Həm ön sözü ilə, həm də hekayənin özü ilə insanı
çox düşündürür. Kitab ölüm cəzasına qarşı çıxıldığı bir dövrdə yazılmışdır. Əlbəttə
o dönəmlərdə hökümət günahkarlara çox ağır işgəncələr verməklə yanaşı ölüm cəzasını
çox rahat və asan bir şəkildə tətbiq edirdi. Buna görə də dövrün ən görkəmli
insanları buna qarşı çıxaraq əsərlər yazmağa başlayırlar ki, “Bir İdam
Mahkumunun Son Günü” də belə əsərlərdən biridir. Edama məhkum olan bir insanın
həyatını oxuyuruq. Çox dəyişik tərzdə kitab olmağına baxmayaraq düşünürəm ki, verilmək istədiyi mesaj çox
düzgün idi. Oxuyun, dili klassik olmağına baxmayaraq asan idi.
Bu ay oxuduqlarımdan bu qədər. Ümid edirəm sevərək
oxuduğunuz bir yazı olmuşdur. Siz bu ay nələr oxudunuz? Fikirlərinizi yazmağı
unutmayın.
0 yorum